Тыдзень беларускай мовы
22.02.202020.02.2020 г. лагічным і добрым пачаткам у чацвер была гульня-конкурс “Буслік”, у якой прынялі ўдзел вучні з 3-га па 11 клас. Яны змаглі адказаць і выканаць заданні творчага характару, адказаць на пытанні конкурсу.
21 лютага ва ўсім свеце адзначаецца Міжнародны дзень роднай мовы. Дзеля папулярызацыі беларускай мовы ў школе прайшла акцыя “Далучыся да роднага слова”, у якой прынялі ўдзел вучні школы, іх бацькі, а таксама настаўнікі. Усім, хто заходзіў у школу, былі прапанаваны малюнкі, якія трэба было назваць беларускімі словамі. Сустракалі іх вучні, якія за ўсмешку і беларускае слова ўзнагароджвалі ўдзельнікаў цукеркамі.
На працягу дня ў фае школы дэманстраваліся відэаролікі пра родную Беларусь, беларускую мову. У другой палове дня адбылася літаратурна-музычная імпрэза “Сэрцам роднага слова краніся…”. Гучалі вершы беларускіх паэтаў, якія падрыхтавалі вучні 5-8 класаў. Напрыканцы мерапрыемства, якое суправаджалася мультымедыйнай прызентацыяй прагучала песня на словы М.Танка “Родная мова”, у выкананні вучня 11 класа.
Суботняе мерапрыемства пачалося з квэст –гульні, якая прайшла насычана і займальна. У шыфроўцы, якую ігракі атрымалі ў пачатку гульні, даваліся каардынаты месца ў школе, якое неабходна было знайсці, дабрацца да яго і там выканаць заданне. Кожная каманда прайшла праз сем выпрабаванняў. Вучні паказалі добрыя веды па беларускай мове і літаратуры.
У апошні дзень тыдня былі падведзены вынікі, а самыя актыўныя ўдзельнікі атрымалі ўзнагароды. Тыдзень мовы і літаратуры закончыўся. Але мерапрыемствы пакінулі прыемныя ўражанні ў вучняў і настаўнікаў. І хочацца верыць, што тыя вучні, якія душой дакрануліся да твораў беларускіх пісьменнікаў, будуць імкнуцца, каб роднае слова гучала.
Я — беларус, i я шчаслiвы,
Што мацi мову мне дала,
Што родных песень пералiвы
I зблiзку чую, i здаля.
Н.Гілевіч
Тэкст і фотаздымкі настаўніка беларускай мовы і літаратуры Барадзіной Н. Л.